Baie jongmense vra, wie is julle, wat doen julle? Ons sien julle nêrens. Waar is julle betrokke? Vir die ANB is die jeug baie belangrik. Daarom is die ANB Jeug geloods. Aksies sal insluit om monumente te besoek om te help om die sigbaarheid van die ANB te verbeter. Ons gaan bv. Voortrekkermonument toe gaan en dan met die ANB se vlag daar staan en volksliedere daar sing en ‘n video daarvan maak wat ons dan op sosiale media versprei wat toon dat ons lewendig is en groei. Op die beginsels van om ‘n mark te skep sal ons jongmense lok wat die regte beginsels wil handhaaf en weer ons vryheid wil herwin. Die jeug is die gesig van die beweging en dit lok ander mense daarheen. Hoe dit gaan werk is elke tak kies sy jeugleiers en voorsitter wat ondergeskik is aan die bestuur van daardie tak en uiteindelik aan die hoofbestuur. As hulle enige aksies wil loods moet hulle eers by hulle takvoorsitters of die dagbestuur toestemming kry. Die voorsitter sê dit is belangrik, want die jeug het baie meer jare wat hulle nog hulle toekoms moet uitwerk in die land. En dan moet hulle die leiding kan oorneem.

Op die 24ste tot die 26ste Februarie het die Afrikaner Nasionalistiese Beweging se Jeug saamgetrek en kamp opgeslaan aan die voet van Majubaberg om die slag van Majuba, 1881 te herdenk.

Om in eendrag by die Majubafees op te daag is T-hemde vir die ANB Jeug vinnig gedruk, mates en grotes vir mekaar uitgestuur en beplanning spoedig gedoen om mekaar by Majuba te ontmoet.

Van wyd en syd oor Suid-Afrika het die jongmense uiteindelik, na die vêr pad op ‘n donker mistige nag, Majubaberg deur die mis gesien, soos ‘n vinger wat uitstaan en uitroep: “Voorwaarts!”

Op die Vrydag het die res van die ANB Jeug aangekom, laer opgeslaan saam met Ds. Appelgryn en sy gesin en lekker saam gekuier om die kampvuur. Daar is elke aand afgesluit met huis-godsdiens. Tannie Zelda Appelgryn het gesorg vir smaaklike etes deur die dag.

‘n Geskiedkundige slagveld toer is aangebied op Vrydag die 24ste wat baie insiggewend en leersaam was vir die ANB Jeug. Om 19:15 is die berg bestyg met die fakkelloop tot op die piek waar die monument in steen opgerig is.

Die Bittereinder Perdekommando het op Saterdag die 25ste ingery gekom met volksvlae, terwyl die ossewa met sweepslag agterna aangejaag is. Opening met Skriflesing en gebed is gedoen, gevolg deur ‘n feesrede deur Henk van den Graaf.

Die hoogtepunt van die dag was die bestyging van die berg en die geskiedenisvertelling op die berg. Die ANB Jeug het aan alles deelgeneem, van skyfskiet tot volkspele. ‘n Realistiese skyngeveg vertoning is aangekondig toe ‘n Engelsman in rooi in oorlogsverklaring uitroep en die Union Jack hys op die piek van die heuwel. Daar is oor en weer gevuur en die donderslae van skote het die herlewing van die Slag in elke Afrikaner se volksbewussyn wakker gemaak.

Laataand is die Cantus bygewoon, geopen met al vier verse van die Stem, met samesang van volksliedere tot laat.

Sondagoggend is die naweek afgesluit met ’n erediens. Met die bywoning van die gedenkdae van die Afrikanervolk, en die deelname in die herlewing van ons kultuur en geskiedenis, leef die stryd voort in elke ANB Jeuglid se hart en is dit die doelstelling van die Afrikaner  Nasionalistiese Beweging:

“Die stryd wat ons vaders begin het sal woed tot ons sterf of oorwin het, dit is die eed van jong Suid-Afrika!”

Ons stel die AFRIKANER NASIONALISTIESE BEWEGING aan u bekend.

Die oomblik van waarheid het onherroeplik vir ons Boere-Afrikanervolk, die nageslag van die Voortrekkers en die Bloedriviergelofte, aangebreek.

Ons durf nie langer na die politici se leë beloftes luister nie. Ons mag nie langer ons gewetens met halwe waarhede van politieke leiers versmoor nie. Deur verraad is ons van ons Vaderland, Suid-Afrika, beroof. Op 6 September 1966 is Dr. HF Verwoerd in die parlement vermoor. Deur hom uit die weg te ruim, het die vyand van die Boerevolk ‘n nuwe tydvak van hervorming en voortdurende verandering ingelei. Hierdie tydvak kulmineer op 2 Februarie 1990, tydens FW de Klerk se rooi Vrydag toespraak, tot die finale ineenstorting voor die ANC-regime. In hierdie laat uur van blanke beskawing in ons Vaderland, wend die Afrikaner Nasionalistiese Beweging (ANB), gedryf deur Vaderlandsliefde, hierdie grootse poging aan om op die basis van Christelike Afrikaner Nasionalisme, ons Volk weereens te versamel en ons vryheid te herwin.

Dit het tyd geword om daadwerklik NEE te sê:

NEE vir die vernietiging van die Christendom in die naam van versoening en valse vrede met die heidendom.
NEE vir vervreemding en afdrywing van ons geboorteland deur grond-hervorming en onteiening met of sonder vergoeding. Hierdie land is deur ons blanke voorsate aan die wildernis ontworstel, deur Afrikaner kennis en kapitaal uitgebou en opgebou tot ‘n eerste wêreld moondheid. Ons het die LAND van niemand gesteel nie. Die HERE het hierdie land aan ons gegee. En Hy het ons hier ‘n Volk laat word.
Ons sê NEE vir die stelselmatige aftakeling van ons Afrikanervolk se morele waardes en hoë sedes wat God ons van ons gelowige voorgeslagte laat erf het, tot aanvaarding van die Afrika barbarisme in die naam van Anti-Rassisme, Demokrasie, Broederskap en Vrede.
NEE vir etniese suiwering deur die mees brutale vermoording van weerlose bejaardes en boere op hul plase.
NEE vir die vernietiging van ons land se ekonomie deur korrupsie en wanbesteding aan ‘n welsynstaat, wat besig is om die belastingdruk op die Blanke tot onaanvaarbare vlakke te verhoog.
NEE vir sluipmoord pogings op die Afrikanervolk deur sy ryke geskiedenis en volkshelde te ontken en historiese waarhede in twyfel te trek ten einde die indruk te wek dat Suid-Afrika nie werklik aan ons behoort nie.
ONS NOOI U UIT:
Word deel van die ANB, want ‘n Volk se eer en selfrespek is net so nodig vir sy voortbestaan as die bodem waarop hy leef.
Dit is die WAARSKUWING:
Indien u huiwer of versuim om saam met mede-volksgenote die uitdagings van ons tyd te aanvaar en ook u offers te bring, sal die geskiedenis u in die beskuldigde bank plaas en u nageslag, die regters, sal van u wil weet wat u gedoen het, toe u saam met mede-Christene moes opstaan en NEE moes sê.
Dit is die HOOP EN TROOS:
ONTHOU: Wat vir die mens onmoontlik is, is by God moontlik!
(Opgestel deur HP de Wet, eerste ANB ondervoorsitter, en ietwat aangepas deur die huidige ANB dagbestuur)

CH van der Grijp

Vandag is daar gedurig ongegronde bewerings dat slegs die mense wat in 1836-1838 getrek het regtig deel is van ons Afrikaner of Boere volk. Die ANB het dit al van te vore veroordeel as onnodige of kwaadwillige skeurmakery.

Die Voortrekkers het die Kaap verlaat omdat hulle onderdruk was deur die Engelse regering en ook in gedurige gevaar verkeer het vanweë die Xhosas se aanvalle op die grens.

Maar baie Afrikaners wat in die Kaap agtergebly het, het nie hulle karakter verloor en in die Engelse opgegaan nie.

Hulle was op die tydstip wat Transvaal ge-anekseer is besig met ‘n stryd om die Kaap te bevry van die Engelse oorheersing. Hulle het die oorloë gevoer teen die swartes aan die oosgrens in die 1870’s. Hulle het ‘n stryd gehad teen verengelsing van hulle skole.

Die Afrikaanse Taal Genootskap is in die Kaap gestig deur Afrikaners wat nie getrek het nie. Selfs in 1905 nog wou meeste Afrikaner redakteurs van koerante in Transvaal nog nie in Afrikaans skryf nie!

Wanneer ons in Augustus die GRA dag herdenk, gedenk ons die stryd wat in die Kaap gevoer is en nie in die ZAR nie.

Die stryd om Afrikanerskap is dus nie laat vaar deur die wat nie getrek het nie. Daardeur is ons een volk deur heel Suid-Afrika.

Ons vlag dien as simbool vir ons organisasie, maar ook as simbool van ons vryheidstrewe.

Ons het die ou Republiekvlag geneem en die Union Jack daar uitgehaal, omdat ons weet dat die Engelse staat nooit opgehou het om ons vyandiggesind te wees nie.

Aanvanklik was die doel met die Union Jack in die ou Republiekvlag, dat dit die Kaap en Natal moet verteenwoordig, verenig op die agtergrond van ons Dietse Protestantse oorsprong wat deur die oranje-blanje-blou verteenwoordig word.

As mens egter na die geskiedenis kyk was die twee provinsies ook onregmatig deur die Engelse verower. Daarom wil ons nie meer aan die Union Jack ‘n plek gee nie.

Ons hoop dat die ANB vlag eindelik as ons nuwe Landsvlag sal wapper oor ons eie vaderland, heel Suid-Afrika, waarin die Afrikanervolk oor homself sal regeer in Afrikaans, met God’s Woord as enigste rigsnoer. Dit is ons ideaal.

Ons noem ons vlag die Afrikaner Bittereindervlag.

deur MJ Erasmus

Wanneer ons besin oor die geloofserfenis van ons Afrikanervolk is ons met een van die mees heilige onderwerpe besig wat daar maar kan wees. ‘n Vaste ingewortelde geloofsoortuiging en onwrikbare geloofsvertroue, in die drie-enige God wat Homself in die Bybel, sy onfeil-bare, gesagvolle en onveranderlike Woord, openbaar, was die grondslag waarop ons volk gebou is en die wortel waaruit ons volk gegroei het. Dít is die fondament van die Afrikanervolk.

Dié geloofsfondament, wat so duidelik uit die wordingsgeskiedenis van ons volk aanwysbaar is, en wat so baie van ons dapper voorgeslagte en volkshelde hul lewens deur besiel het, het dié merkteken van die ware Boer/Afrikaner geword. Die dankbare wete dat die HÉRE ons ‘n volk gemaak het, dat Hý aan ons ‘n vrye Vaderland en soete Moedertaal geskenk het, om te alle tye te koester en beskerm, het die basiese lewens-opvatting van die deursnee Afrikaner geword. Die eer van God en ‘n opregte dankbaarheidslewe vir die genadige verlossing in Christus, het die rigting-wyser vir ons daaglikse lewens geword. Die suiwer geloofswortels, van geslag na geslag van ouers en grootouers aan kinders en kindskinders oorgedra, het die wese van ons Volksidentiteit geword.

Deur die vaste en sekere Bybelse geloofsuitkyk as dryfveer is, deur die genade van God, die allerfelste beproewinge van onder andere die Groot Trek en veral die Tweede Vryheidsoorlog deurleef en is ons Vaderland in geloof en toewyding opgebou, op eerbare wyse deur harde werk en volharding. Die HERE het ons volk besonderlik begenadig, om ten spyte van die vyande wat ons wou vernietig, op 31 Mei 1961 dié grootse dag te laat beleef, toe onder Afrikaner-bewind ‘n vrye Republiek oor heel Suid-Afrika uitgeroep is. Soos in die destydse Boererepublieke sou in die grondwet van ons Republiek van Suid-Afrika duidelik verklaar word, dat die HERE self die hoogste gesag is en dat sy Woord die fondament is waarop ons ons Vaderland wil regeer. Dieselfde geloof besing ons in ons volkslied, die Stem van Suid-Afrika: ”knegte van die Allerhoogste teen die hele wêreld vry”.

As ons vandag vra waarom hierdie Afrikaner-Boere Republiek so gehaat en gehoon is deur ons vyande en deur wêreldmagte op soveel gebiede beveg is, lê die antwoord opgesluit onder andere in die woorde van Openbaring 12 vers 17: “En die draak was vertoornd op die vrou, en hy het weggegaan om oorlog te voer teen haar ander nakomelinge wat die gebooie van God bewaar en die getuienis van Jesus Christus hou.” Ja, die magtiges van hierdie wêreld het hulle hande uitgesteek na die rykdom van ons land. Hulle het vandag alles wat hulle wou vir hulleself ingepalm. Maar daar agter sien ons die Satan wat oorlog voer en die ware geloof, waarop die HERE ons hier gegrondves het, wil vernietig.

Daarom is ons vandag steeds besiel met ons geloofsroeping en hou ons as ware Afrikaners vas aan die woorde van Christus in Johannes 16 vers 33: “In die wêreld sal julle verdrukking hê; maar hou goeie moed, Ek het die wêreld oorwin.” En ons dink aan die eenvoudige woord van ons geliefde President Paul Kruger: “Salisbury sê: Dié volk mag nie bestaan nie. Maar God sê: Die volk sal bestaan! Wie is dan reg? Tog sekerlik die Here.”